TALTES

“O‘zenergosozlash” MCHJ mutaxassislari tomonidan “Talimarjon IES” korxonasida elektr energiyasi ishlab chiqarish jarayonining texnik barqarorligi va sifat ko‘rsatkichlarini baholash maqsadida maxsus texnik o‘rganish hamda nazorat-o‘lchov ishlari amalga oshirildi. O‘rganish jarayonida elektr energiyasining asosiy sifat ko‘rsatkichlarini belgilangan texnik me’yorlar asosida baholashga alohida e’tibor qaratildi. Jumladan, elektr tarmog‘idagi kuchlanishning og‘ishi va tebranishlari, chastota qiymati, fazalar o‘rtasidagi yuklamalarning muvozanatlanganlik darajasi hamda elektr energiyasi parametrlarining barqarorligi maxsus o‘lchov vositalari yordamida nazorat qilindi. Shuningdek, elektr energiyasini ishlab chiqarish va tarmoqqa uzatish jarayonida yuzaga kelishi mumkin bo‘lgan kuchlanishning keskin o‘zgarishi, yuqori garmonikalar, fazalar nosimmetriyasi va elektr energiyasi sifatiga ta’sir ko‘rsatuvchi boshqa omillar tahlil qilindi. Mazkur ko‘rsatkichlarni o‘rganish elektr tarmog‘ining ishonchliligini ta’minlash, elektr jihozlarining me’yoriy ishlashini nazorat qilish hamda iste’molchilarga yetkazib berilayotgan elektr energiyasi sifatini oshirishda muhim ahamiyat kasb etadi.